Teaterstykket Problembarna handlar om barn i tidleg ungdomsalder som slit med ulike psykiske utfordringar. Dei blir sette på som problembarn og blir difor jamleg sende, over kortare periodar, til Magdadon – eit avlastingssenter for ungdom.

Vi følgjer fire av dei eldste jentene som har kome fram til at for at livet skal bli betre, må dei ta saka i eigne hender og endre verda – og dermed også sin eigen kvardag. For å klare å skape endring, treng dei fleire medspelarar, og dei kartlegg dei seks nye barna som kjem til senteret denne veka.

Gjennom å bli kjent med dei nye, oppstår både drama og konfliktar, og samarbeid blir ikkje så enkelt som dei fire jentene hadde sett for seg frå starten av. Men så kjem fire yngre jenter – feer – til senteret. Dei er der på sitt eige oppdrag, som kanskje nettopp handlar om å få ungdomane til å forstå kva som er rett og gale, og korleis dei må gi og ta for å kunne samarbeide.

Etter kvart som ungdomane sakte, men sikkert, endrar strategi, oppdagar dei at dei har mykje til felles – og at dei kan vere til hjelp og støtte for kvarandre.

Men kven var eigentleg desse barna som kom og redda dei? Var dei verkelege? Var dei feer eller barn? Eller fanst dei berre i fantasien?

Teaterstykket varer i 1 time og passer for alle.